.jpg)
Watu wanne wamefariki dunia hapo hapo huku wengine 22 wakijeruhiwa katika ajali iliyohusisha gari aina ya Tata yenye namba za usajili T 390 DEQ iliyokuwa inatokea kijiji cha Maundo wilayani Tandahimba, mkoani Mtwara kuelekea jijini Dar es Salaam.
Wakizungumza na ITV baadhi ya majeruhi waliolazwa katika hospitali ya Nyangao wamesema chanzo cha ajali hiyo ni mwendo kasi wa dereva.
Kwa upande wake muuguzi mfawidhi wa hospitali ya Nyangao, Edgar Chilemba,amekili kupokea miili ya marehemu wanne pamoja na majeruhi 22 ambao wanaendelea na matibabu katika hospitali hiyo.
ITV ilimtafuta kwa njia ya simu kamanda wa polisi mkoa wa Lindi, Renata Nzinga lakini simu yake ilipokelewa na mlinzi wake na kusema bosi wake yuko kwenye kikao.
