Akiwa katika wilaya ya Mjini magharibi 'A' katika siku ya pili ya Ziara yake aliyoianza jana Ijumamosi katika mkoa wa mjini magharibi, visiwani Zanzibar, Rais wa Zanzibar na mwenyekiti wa baraza la mapinduzi Dkt Ali Mohamed Shein amewataka Wanafunzi wa skuli za msingi na Sekondari visiwani Zanzibar kujikita katika masomo zaidi na kwamba waachane na masuala ya anasa hadi watakapofikia umri na wakati sahihi.
Kauli hiyo ameitoa mara baada ya kuweka jiwe la msingi katika skuli ya msingi ya Kihinani iliyopo wilaya ya Mjini magharibi 'A' iliyogharimu shilingi milioni 45, ambapo aliongeza kuwa serikali yake itaendelea kiboresha na kutoa elimu bure ikiwa ni jitahada zilizoanzishwa na serikali ya awamu ya kwanza visiwani humo baada ya mapinduzi.
Aidha, baada ya hafla hiyo, Rais Shein amekagua ujenzi wa mradi visima 9 vya maji safi na salama wa Bumbwisudi, ambapo kwamujibu wa mkurugenzi mkuu wa mamlaka ya maji Zanzibar (ZAWA) Dkt Mustafa Ali Guru amemueleza Rais Shein kuwa mradi huo wenye uwezo wa kuzalisha lita laki mbili na elfu ishirini kwa saa utakamilika nankukabidhiwa mwezi wa kwanza mwaka 2018.
Katika sehemu ya mwisho ya ziara hiyo kwa leo Ijumapili 20/ 08/ 2017, Rais Shein ambaye pia ni mwenyekiti wa Baraza la Mapinduzi ameweka jiwe la msingi tawi la CCM la Bumbwisudi katika jimbo la mfenesini, ambapo amewataka viongozi wa chama kuhakikisha wanawatumikia wananchi kama ilivyoelekezwa kwenye ila ya chama cha mapinduzi.
Rais Shein ataendelea na kumaliza ziara hiyo kesho Siku ya Ijumatatu Agosti 21, katika wilaya ya Magharibi 'B'
Ziara hiyo ni ya kwanza kwa Rais Shein tangu achaguliwe katika uchaguzi wa marudio mwaka jana, Na ni ya tatu tangu aingie madarakani mwaka 2010.
