Maulid Kitenge aondoka Wasafi FM na kurudi EFM

Mtangazaji maarufu wa Habari za Michezo nchini Tanzania, Maulid Kitenge amerudi EFM baada ya kuachana na kituo cha redio cha WasafiFm alichokuwa anafanyia kazi.
 

Maulid amerudi EFM, ambacho ni kituo chake cha awali alichokuwa anafanyia kazi kabla ya kwenda Wasafi Fm, redio inayomilikiwa na mwanamuziki, Diamond Platinumz.

Mkurugenzi wa TVE na redio EFM, Francis Ciza maarufu Majizzo kupitia ukurasa wake instagram amemkaribisha Maulid kurejea kituoni hapo akisema anarudi NYUMBANI.

“Tarehe 18 Octoba 2019, nilipost hapa ‘instagram’ kumuaga ndugu Maulid Kitenge ikiwa ni baada ya kukaa naye kwa takriban miaka 5. Mimi na yeye tuliagana vizuri, tulitakiana heri. Tuliachana kwa wema. Kwangu maisha yanapaswa kuwa hivyo.

Baada kukamilisha yaliyo mpeleka kule Kocha Mchezaji Maulid Kitenge, anarudi tena hapa ambapo bila shaka ni nyumbani kwake. Yeye ni kati ya watangazaji wa mwanzo hapa EFM, ni furaha kubwa sana kumkaribisha tena tufurahie pamoja hatua tulizofikia na kuendeleza mapambano zaidi". - Unasomeka ujumbe wa Majizzo.